Rubio niset drejt Gjirit Persik teksa SHBA-ja synon vulosjen e kornizës me Iranin

Sekretari amerikan i Shtetit, Marco Rubio, do të udhëtojë këtë javë në Emiratet e Bashkuara Arabe, Kuvajt dhe Bahrejn, në vizitën e tij të parë zyrtare në Gjirin Persik qëkurse shpërtheu lufta me Iranin, dhe vetëm disa ditë pasi Uashingtoni dhe Teherani nënshkruan një marrëveshje kornizë për të sjellë paqe në rajon.

Në qendër të misionit diplomatik të Rubios, i cili synon t’i sigurojë aleatët rajonalë për drejtimin strategjik të administratës Trump ndaj Teheranit, do të jetë gjithashtu forcimi i protokolleve të sigurisë rreth Ngushticës së paqëndrueshme të Hormuzit.

Vizita e tij, nga 23 deri më 25 qershor, do zhvillohet në një kohë vendimtare për politikën e jashtme amerikane: sepse ndodh pas bisedimeve intensive të fundjavës në Zvicër, gjatë të cilave, sipas nënpresidentit JD Vance, u krijua një “themel i fortë për një marrëveshje të suksesshme përfundimtare” për t’i dhënë fund konfliktit në Lindjen e Mesme.

Zëdhënësi i Departamentit të Shtetit, Tommy Pigott, konfirmoi se Rubio do të diskutojë “prioritetet rajonale, përfshirë memorandumin e mirëkuptimit me Iranin, përpjekjet për të siguruar kalim të plotë, të lirë dhe të sigurt përmes Ngushticës së Hormuzit, si dhe rëndësinë e paqes dhe stabilitetit në rajon”.

Ky udhëtim me rëndësi të lartë nënvizon përpjekjen më të gjerë të administratës Trump për t’i shndërruar përparimet e brishta diplomatike në garanci të qëndrueshme sigurie për partnerët e Gjirit, shumë prej të cilëve janë thellësisht skeptikë nëse Teherani do t’iu përmbahet zotimeve, pavarësisht uljes së fundit të tensioneve.

Balancimi i diplomacisë dhe parandalimit

Misioni i Rubios në Gjirin Persik është t’i çojë përpara dy synime paralele: konsolidimin e momentumit diplomatik të krijuar në Zvicër dhe ruajtjen e arkitekturës e sigurisë rajonale.

Gjatë bisedimeve të fundjavës, nënpresidenti Vance tregoi se Uashingtoni po shqyrton masa për ndërtimin e besimit për ta ruajtur vrullin e negociatave. Veçanërisht, Shtetet e Bashkuara mund ta marrin në konsideratë zhbllokimin e disa aseteve iraniane vetëm për blerjen e mallrave bujqësore amerikane, konkretisht sojës, misrit dhe grurit. Kjo masë do të synonte lehtësimin humanitar duke ruajtur njëkohësisht levën kryesore ekonomike.

Policia australiane ka sekuestruar 2.7 tonë kokainë, kapja më e madhe e këtij lloji e regjistruar ndonjëherë në vend. Droga, me një vlerë të vlerësuar prej rreth 816 milionë dollarësh australianë në tregun e zi, u gjet e fshehur në një sistem bunkerësh nëntokësorë poshtë tre kontejnerëve transporti në periferinë perëndimore të Sidneit.

Dy persona, 21 dhe 25 vjeç, u arrestuan në vendngjarje pasi dyshohet se tentuan t’i largoheshin policisë. Ata akuzohen për posedim të një droge të importuar në mënyrë të paligjshme dhe, nëse shpallen fajtorë, rrezikojnë burgim të përjetshëm.

Sipas hetimeve, kokaina ishte futur në Australi përmes zonës së Midge Point në Queenslandin Verior, me urdhër të një grupi të organizuar kriminal. Operacioni policor u nis pasi në muajin maj u gjetën 40 kilogramë kokainë që lundronin në det pranë një zone ankorimi për varka.

Autoritetet kanë arrestuar edhe gjashtë persona të tjerë në shtetet Queensland dhe Uellsi i Ri Jugor, ndërsa një anije e dyshuar si pjesë e rrjetit të trafikimit është ndaluar në Ishujt Solomon.

Policia federale australiane deklaroi se rasti tregon nivelin e lartë të organizimit të rrjeteve kriminale ndërkombëtare dhe vendosmërinë e tyre për të përfituar nga tregu fitimprurës i drogës në Australi, ku çmimi i kokainës është ndër më të lartët në botë. Hetimet për origjinën e drogës dhe personat e përfshirë në këtë operacion vazhdojnë.