Seri perfekte pa pësuar, Vllaznia në formë të jashtëzakonshme

Mbrojtja e Vllaznisë konfirmohet si më e mira e sezonit 2025-26 deri në javën e 32-të të kampionatit. Kuqeblutë kanë pësuar vetëm 21 gola, duke lënë pas rivalët direkt në këtë aspekt dhe duke ndërtuar një nga pikat më të forta të skuadrës në rrugën drejt objektivave madhorë. Pas Vllaznisë renditen Dinamo me 26 gola […]

Mbrojtja e Vllaznisë konfirmohet si më e mira e sezonit 2025-26 deri në javën e 32-të të kampionatit. Kuqeblutë kanë pësuar vetëm 21 gola, duke lënë pas rivalët direkt në këtë aspekt dhe duke ndërtuar një nga pikat më të forta të skuadrës në rrugën drejt objektivave madhorë.

Pas Vllaznisë renditen Dinamo me 26 gola të pësuar, si dhe dyshja Egnatia dhe Elbasani, që kanë pësuar nga 27 gola secila. Ky diferencim tregon qartë stabilitetin që shkodranët kanë shfaqur në prapavijë gjatë gjithë sezonit, duke qenë skuadra më e disiplinuar në fazën mbrojtëse. Forma më e mirë e këtij reparti ka ardhur pikërisht në fazën e katërt dhe aktuale të kampionatit. Ekipi i drejtuar nga Edi Martini nuk ka pësuar asnjë gol në këtë periudhë, duke regjistruar një seri rezultatesh që konfirmojnë organizimin dhe përqendrimin maksimal të skuadrës.

Në këtë fazë, Vllaznia ka marrë dy barazime 0-0 ndaj Egnatias dhe Dinamos, një fitore të rëndësishme 0-2 ndaj Partizanit, si dhe një sukses minimal 1-0 ndaj Teutës. Së fundmi, kuqeblutë barazuan 0-0 edhe ndaj Vorës, duke vijuar serinë pa pësuar. Në total, shkodranët kanë arritur në kuotën e 450 minutave pa pësuar gol, një tregues i qartë i qëndrueshmërisë dhe disiplinës në mbrojtje.

Linja defensive ka funksionuar në mënyrë kompakte, ndërsa edhe pjesa tjetër e skuadrës ka kontribuar në fazën pa top, duke e bërë të vështirë për kundërshtarët krijimin e rasteve të pastra. Kjo ecuri vjen në një moment vendimtar të sezonit, ku çdo detaj mund të bëjë diferencën. Vllaznia po mbështetet fort te siguria në prapavijë për të ruajtur avantazhin dhe për të menaxhuar ndeshjet me maturi. Nëse kjo vazhdimësi ruhet, mbrojtja pritet të mbetet një nga armët kryesore të skuadrës deri në fund të edicionit.