Shefi i komisionit britanik të etikës tërhiqet përkohësisht pas akuzave për ngacmim seksual

Drejtuesi i organit kryesor të etikës së qeverisë britanike, Stuart Sterling, është tërhequr përkohësisht nga detyra, pasi u zbulua se në punën e tij të mëparshme si polic ishte hetuar për akuza për ngacmim seksual ndaj kolegeve dhe në një rast ishte sanksionuar, siç njofton Sunday Times, shkrimin e së cilës e ka përcjellë edhe BBC.

Sterling u emërua në tetor 2025 drejtuesi i parë ekzekutiv i Komisionit të Etikës dhe Integritetit, organ i krijuar rishtazi, dhe detyra e tij përfshinte këshillimin e kryeministrit për përballimin e sjelljeve të papërshtatshme në jetën publike. Partia Laburiste e kishte premtuar krijimin e komisionit në manifestin e vitit 2024, për të garantuar ndershmërinë në qeverisje pas skandaleve të periudhës së pandemisë. Pas publikimit të shkrimit, një zëdhënës i qeverisë tha: “Këto janë akuza serioze. Stuart Sterling është tërhequr nga detyra ndërsa ne po i verifikojmë faktet me shpejtësi.”

Sipas Sunday Times, në vitin 2003 Sterling, asokohe oficer i ri në Policinë e Northamptonshire, iu nënshtrua një seance të plotë disiplinore në një çështje të trajtuar si ngacmim seksual: ai akuzohej se kishte prekur në mënyrë të papërshtatshme gjoksin e një kolegeje në ambientet e stacionit të policisë, ngjarje që u raportua nga një koleg që pretendohet se e kishte parë. Ai u pezullua me pagesë të plotë. Përfaqësuesi i tij tha se procesi disiplinor për ankesën e vitit 2002 u zhvillua plotësisht, se Sterling bashkëpunoi dhe se procesi përfundoi me një sanksion. Gjithmonë sipas gazetës, sanksioni ishte një gjobë sa dy javë rrogë — masa maksimale e mundshme pa shkarkim të detyruar — dhe më pas ai mori dy vlerësime policore dhe u ngrit në detyrë si rreshter detektiv.

Gazeta shkruan gjithashtu se deri në vitin 2008 Sterling ishte raportuar sërish, pas një tjetër akuze për ngacmim seksual ndaj një kolegeje, këtë herë në një takim shoqëror jashtë pune. Përfaqësuesi i tij tha se ai e mohon që ngjarja e pretenduar e vitit 2008 të ketë ndodhur ndonjëherë, se nuk ka qenë kurrë objekt i ndonjë hetimi penal, por akuza u shqyrtua nga standardet profesionale, dhe se nuk iu kërkua të jepte dorëheqjen nga policia, por u largua me vullnetin e tij. Policia e Northamptonshire konfirmoi se ruan një regjistër digjital të procesit disiplinor të vitit 2002, ndërsa nuk komentoi akuzën e mëvonshme.

Në vitin 2009 Sterling iu bashkua Zyrës së Kabinetit, ndërsa në vitin 2023 mori titullin OBE për ndihmën në planifikimin e funeralit të Mbretëreshës Elizabet. Tani kuptohet se Zyra e Kabinetit do të shqyrtojë nëse gjatë emërimit të tij janë bërë deklarimet e duhura dhe korrekte të informacionit.