Shote Galica, Heroina e Popullit që luftoi për çlirim e bashkim kombëtar

Më 10 nëntor të vitit 1895, lindi në Drenicë luftëtarja Shote Galica.

E mbrujtur qyshse fëmijë me bëmat e trimëreshave shqiptare, Shote Galica dëshmoi se lufta nuk është një atribut gjinor, duke rrokur armën përkrah të shoqit, Azem Bejtes. Thënia e saj emblematike “Jeta pa dije është si një luftë pa armë”, është një postulat që rimerret për të çmuar kultivimin e brezave.

Emri i vërtetë i bijës së Radishevës ishte Qerime. Ajo ishte e vetmja vajzë e familjes, që u rrit njësoj si gjashtë vëllezërit, duke u frymëzuar prej patriotëve të kohës, sikurse ishin: Isa Boletini, Mehmet Deliu, Ramadan Radisheva dhe Halit Bajrami. Shote Galica u shqua për qendresën e palëkundur ndaj autoriteteve ushtarake serbe prej fillimit të viteve ’20, deri kur u zhvendos në Shqipëri.

Në të dalë të dimrit të vitit 1926, u vendos në Shullaz të Krujës, së bashku me fëmijë të të rënëve.

Drejtoria e Përgjithshme e Arkivave sjell një fragment nga një letër që Shote Galica i drejtonte Ahmet Zogut. “Janë fëmijët e luftërave të vramë për çlirim të Kosovës. Jam e shtrëngueme t’ju vnoj në dijeni se jam tuj vdekë unit bashkë me fëmijët jetim”, shkruante Shote Galica, pak kohë para se të shuhej. Në emër të kontributit të saj atdhetar, u nderua me titullin “Heroinë e Popullit”.