Skandal! Nishani s’harron përplasjen me Zhitin, largon ambasadorët nga Presidenca!
Një skandal është shënuar në Presidencën shqiptare, aty ku këtë mbrëmje, kreu i shtetit kishte organizuar një pritje për ambasadorët shqiptarë nëpër botë të cilët ndodhen në atdhe në kuadër të “Konferencës së Ambasadorëve 2016”.
Në këtë ceremoni pritjeje në selinë e Presidencës, ishin të ftuar të gjithë ambasadorët shqiptarë në botë si dhe ministri i Punëve të Jashtme Ditmir Bushati. Ministri ka mbërritur për të marrë pjesë në ceremoni së bashku me të ngarkuarin me punë në Vatikan, Visar Zhitin, por duket se përplasjet e vazhdueshme që presidenti Nishani ka pasur për dekretimin e Zhitit si ambasador në Vatikan, e kanë shtyrë atë të bëj një veprim të paprecedentë.
Kur thuajse të gjithë ambasadorët ishin mbledhur për pritjen, me të parë prezencën e ministrit Bushati me Zhitin, drejtori i kabinetit Olsi lase ka dalë t’i njoftojë krejt papritur, se ceremonia ishte anuluar.
Argumenti që ai ka dhënë është se “presidenti Nishani kishte një takim tjetër”. Ky njoftim erdhi teksa ministri dhe ambasadorët prisnin në sallë. Me herët ambasadorët u takuan me kryeministrin Edi Rama dhe kryeparlamentarin Ilir Meta.
