SPAJIQ: ANËTARËSIMI NË BE, MUNDËSI E RËNDËSISHME ZHVILLIMI PËR MALIN E ZI

_{Foto: Qeveria e Malit të Zi / Vlada Crne Gore}

Anëtarësimi në Bashkimin Evropian përbën një mundësi të rëndësishme zhvillimi për Malin e Zi, veçanërisht përmes qasjes në tregun e përbashkët evropian, deklaroi kryeministri Millojko Spajiq në takimin vjetor të Forumit Ekonomik Botëror në Dubai.

Ai theksoi se ekonomive të vogla, si ajo malazeze, u nevojitet një treg më i madh, ndërsa integrimi evropian mund të krijojë kushte për rritje ekonomike dhe tërheqjen e investimeve.

Spajiq bëri të ditur se synimi është mbyllja e të gjithë kapitujve të negociatave deri në fund të këtij viti, me pritshmëri që Mali i Zi të bëhet anëtar i plotë i BE-së në vitin 2028.

Ai gjithashtu nënvizoi rëndësinë e forcimit të tregut të përbashkët evropian, heqjes së barrierave tregtare dhe përshpejtimit të zhvillimit teknologjik, duke vlerësuar se projekti evropian mbetet një nga nismat më të rëndësishme të paqes në botë.