Spajiq dhe von der Leyen: Mali i Zi po përgatitet për rolin e ruajtësit të kufirit të jashtëm të BE-së

Kryeministri i Malit të Zi, Milojko Spajiq, deklaroi se vendi është në rrugën drejt Bashkimit Evropian dhe vazhdon të forcojë kapacitetet që do t’i duhen pas anëtarësimit. Mesazhi u dha me rastin e hapjes së Qendrës Kombëtare Koordinuese të Policisë Kufitare në Podgoricë, siç raporton CdM.

“Në rrugën drejt BE-së – gjithmonë një hap përpara. Me hapjen e Qendrës Kombëtare Koordinuese të Policisë Kufitare, në Podgoricë, forcojmë mbrojtjen e kufijve tanë dhe përgatisim Malin e Zi për rolin e ardhshëm si rojë i kufirit të jashtëm të Bashkimit Evropian”, tha Spajiqi.

Krijimi i qendrës së re koordinuese shihet si hap kyç në modernizimin e policisë kufitare malazeze, e cila në të ardhmen do të bashkëpunojë ngushtësisht me Frontex-in dhe institucionet e tjera të sigurisë së BE-së.

Në të njëjtën frymë, presidentja e Komisionit Evropian, Ursula von der Leyen, shtoi se BE-ja po përgatitet për anëtarësimin e ardhshëm të Malit të Zi. “Po përgatitemi që kufijtë e Malit të Zi të bëhen kufij të Bashkimit Evropian”, deklaroi ajo, sipas njoftimit të qeverisë.

Spajiqi e përmbylli me bindjen se Mali i Zi do të vazhdojë të ecë me ritëm të lartë drejt Brukselit, duke shtuar se forcimi i sigurisë kufitare është një nga detyrat kryesore që i presin vendit në fazën përfundimtare të negociatave.