Studentët në Serbi nisin aksionin “Priloži za pobedu” — mbledhje parash për fushatën zgjedhore

Studentët e Listës Studentore kanë nisur sot aksionin «Priloži za pobedu» (Kontribuo për fitoren), një fushatë për mbledhjen e fondeve zgjedhore për zgjedhjet parlamentare të 25 tetorit në Serbi. Aksioni starton në Novi Sad, ku studentët do të kenë standin e tyre në Sheshin e Drithit (Žitni trg) duke nisur nga ora 17:00.

Donacionet janë të mundshme vetëm përmes llogarisë rrjedhëse bankare — vullnetarët në stand do t’u shpjegojnë qytetarëve mënyrën më të thjeshtë për t’i mbështetur. Si grup qytetarësh, studentët kanë një llogari rrjedhëse ku mund të derdhen donacionet; aplikacioni që do ta lehtësojë procesin pritet të jetë gati së shpejti. Qytetarët mund të kontribuojnë edhe në sportelet e bankave, por paraprakisht duhet të plotësojnë dhe nënshkruajnë një deklaratë — formularët do të shpërndahen nëpër stande.

Paratë e gatshme (kesh) nuk mund të dhurohen, për shkak të procedurave strikte të financimit të fushatave politike. Asnjë donacion nuk mund të derdhet në llogari pa deklaratën e plotësuar dhe të nënshkruar. Procedura nuk është e ndërlikuar, por është strikte: çdo donacion duhet të lidhet me një person fizik apo juridik, në mënyrë që të dihet origjina e parave.

Studentët thonë se interesimi i qytetarëve për të dhuruar është i madh — «sidomos 6.000 dinarët që shteti po i ndan me qëllim blerjen e votave», u shprehën ata. Aksioni vjen pasi Komisioni Republikan i Zgjedhjeve (RIK) shpalli zyrtarisht Listën Studentore «Studentët fitojnë», e cila renditet e treta në fletën e votimit.

Burimi: Danas