TatimeT: 41 sektorët me potencial të lartë të mospagimit të taksave

Sektorët me riskun më të lartë në mospagimin e taksave janë tregtia me shumicë dhe pakicë të mallrave, shërbimet profesionale të biznesit, sektori i ndërtimit, hotelet dhe restorantet. Drejtoria e Riskut në Tatime ka bërë një plan strategjik se si do të zhvillohen kontrollet me bazë riskut këtë vit.

Rreth 18% e bizneseve e tregtisë me pakicë thyejnë ligjshmërinë fiskale dhe pagesën e taksave, duke e renditur atë në krye të sektorëve më të lartë në riskun e pajtueshmërise ligjore dhe pagesës së taksave

Gjithashtu nga analiza e riskut është evidentuar se 16.6 për qind e bizneseve të sektorit të tregtisë me shumicë shmangin taksat. Kjo normë shmangie tek shërbimet profesionale të biznesit është mbi 10 për qind dhe tek sektori i ndërtimit është mbi 9%.

Në planin e punës për 2016 drejtoria e Riskut në DPT shpjegon se sektorët e lartëpërmdendur do të jenë në boskun e kontrolleve për këtë vit. Analiza e riskut ka seleksionuar 41 sektorë me potenciale të lartë të evazionit fiskal

Ekspertët e riskut në tatimeve kanë shpjeguar se, analiza e përgjithshme mbi shpërndarjen e riskut në rajonet tatimore dhe në sektorët ekonomikë prioritarë hartohen duke u mbështetur në rezultatet e gjeneruara nga kriteret e riskut, për numrin e tyre të thyer, si dhe tatimin e rrezikuar të llogaritur nga të gjitha kriteret, për secilin tatimpagues.

Për çdo kategori të tatimpaguesve janë përgatitur njoftime specifike sensibilizuese dhe informuese, në vartësi të problematikës së tatimpaguesit.

Drejtoria e analizës së riskut kas përpunuar dhe seleksionuar 10 listave me tatimpagues të identifikuar me risk të lartë për fenomene specifike.