Tek Arsenal ka optimizëm, Saka: Jemi vetëm disa ndeshje larg arritjes së qëllimit tonë

Barazimi i djeshëm i Manchester City (3-3 ndaj Everton) ka lënë për momentin Arsenal 5 pikë para “citizens” në krye të renditjes së Premier League. Tashmë titulli kampion është në duart e “topçinjve”, që duhet t’i fitojnë tri sfidat e mbetura.

Kjo situatë ka ngrohur disi sulmuesin Bukayo Saka, që i rikthyer së fundi nga dëmtimi pritet të ndihmojë skuadrën edhe në arritjen e një tjetër objektivi, kualifikimi në finalen e Champions League (realizoi gol në fitoren 3-0 ndaj Fulham).

“Kemi mundësinë të fitojmë dy trofe të rëndësishëm. Jemi vetëm disa ndeshje larg arritjes së këtij qëllimi. Djemtë ndihen jashtëzakonisht të privilegjuar që janë në këtë pozicion. Përgjatë këtij sezoni e kemi treguar se çfarë lloj ekipi jemi“, tha Saka.

Në përballjen sot ndaj Atletico Madrid, ai pret mbështetjen e tifozëve: “Është pikërisht ajo që na duhet në këto momente. Nëse mund të krijojmë atë sinergji midis lojtarëve, lëvizjeve dhe tifozëve, do të jemi një kundërshtar i frikshëm“.