TEL AVIV – Urdhri i Izraelit për evakuim shkakton panik në jug të Libanit

TEL AVIV, 5 gusht /ATSH-DPA/- Ushtria izraelite u bëri thirrje sot banorëve të fshatit al-Mansouri, pranë qytetit bregdetar të Tiros në jug të Libanit, të evakuohen dhe të lëvizin të paktën 1 kilometër në veri.

Ky është urdhri i parë i evakuimit, që nga hyrja në fuqi e armëpushimit të ri mes Izraelit dhe Hezbollahut, i shpallur në qershor.

Menjëherë pas paralajmërimit, ushtria izraelite njoftoi se kishte kryer sulme në jug të Libanit, duke pretenduar se Hezbollahu kishte shkelur rëndë armëpushimin.

Izraeli nuk dha detaje për objektivat e goditura, ndërsa përmasat e sulmeve mbetën të paqarta.

Dëshmitarët thanë se banorët u larguan në panik drejt qytetit të Tiros pas urdhrit të evakuimit.

Burime libaneze të sigurisë thanë se disa pjesë të fshatit ndodhen nën kontrollin e ushtrisë izraelite.

Hezbollahu dhe qeveria libaneze e konsiderojnë të paligjshme sipas së drejtës ndërkombëtare “zonën e sigurisë” të shpallur njëanshmërisht nga Izraeli në jug të Libanit, e cila përfshin rreth 620 kilometra katrorë, ose rreth 6% të territorit të Libanit.

Armëpushimi i ri mes Izraelit dhe Hezbollahut është në fuqi që nga 19 qershori.

Megjithëse përplasjet janë reduktuar, ushtria izraelite ka vazhduar të kryejë sulme në jug të Libanit.

Në fund të qershorit, Izraeli dhe qeveria libaneze ranë dakord për një kornizë që synon arritjen e paqes dhe sigurisë, por Hezbollahu e ka refuzuar këtë marrëveshje. /