Tifozët e Sutjeskës hynë në stadium para ndeshjes me Deçiqin: një i arrestuar, shtatë do të procedohen

Policia e Malit të Zi ka arrestuar një person dhe ka njoftuar procedim kundërvajtës ndaj shtatë të tjerëve, pasi tifozë të klubit Sutjeska nga Nikshiqi shkaktuan trazira në stadium para ndeshjes së mbrëmjes së djeshme kundër Deçiqit nga Tuzi. Ngjarja ndodhi më 13 shtator, rreth orës 18:30, pak para fillimit të takimit, në stadiumin e klubit “Sutjeska”.

Sipas njoftimit të Drejtorisë së Policisë, punonjësi i shërbimit të sigurisë të angazhuar për ndeshjen lajmëroi Shërbimin e Dezhurnit të Departamentit të Sigurisë në Nikshiq se një grup tifozësh të Sutjeskës, të njohur si “Vojvode”, kishin hyrë në ambientet e stadiumit te hyrja VIP. Gjatë hyrjes, ata thyen një shishe qelqi dhe shtynë një punonjës të sigurisë, para se të drejtoheshin drejt pistës atletike.

Pas njoftimit, ndërhyri Grupi Ndërhyrës i policisë, i cili në pistën atletike gjeti tetë persona: M.D (44), F.L (21), R.Đ (28), A.M (27), S.K (24), I.R (28) dhe Lj.A (22) nga Nikshiqi, si dhe N.K (18) nga Danillovgradi. Të tetë u dërguan në ambientet e Departamentit të Sigurisë në Nikshiq, ku u morën deklaratat e tyre me procesverbal lidhur me rrethanat e ngjarjes së raportuar.

Prokurori i shtetit në Prokurorinë Themelore të Shtetit në Nikshiq u njoh me rastin dhe u shpreh se veprimet e personave në fjalë nuk përmbajnë elemente të veprës penale për të cilën ndjekja bëhet kryesisht. Megjithatë, në vijim të veprimeve për kundërvajtjet e kryera, policia e privoi nga liria njërin prej tyre, M.D-në, për kundërvajtje nga Ligji për Rendin dhe Qetësinë Publike dhe nga Ligji për Parandalimin e Dhunës dhe Sjelljes së Papërshtatshme në Manifestimet Sportive; ai do të dërgohet pranë Gjykatës kompetente për Kundërvajtje brenda afatit ligjor, bashkë me kërkesën për fillimin e procedurës kundërvajtëse.

Ndërkaq, policia njoftoi se ndaj shtatë personave të tjerë do t’i paraqesë Gjykatës për Kundërvajtje kallëzime kundërvajtëse në procedurë të rregullt, për kundërvajtje nga fusha e Ligjit për parandalimin e dhunës dhe sjelljes së papërshtatshme në manifestimet sportive.

Burimi: Vijesti