Ylli i Hollivudit, Jack Nicholson i jep fund aktrimit

Ylli i Hollivudit, Jack Nicholson, nuk do t’i rikthehet aktrimit pasi tashmë vazhdon të bëjë një jetë të izoluar. Lajmin e konfirmoi miku i tij Michael Douglas.

Fitues 3 herë i çmimit Oscar, 89-vjeçari Nicholson konsiderohet gjerësisht si një nga aktorët më të mirë të ekranit të shekullit të njëzetë, me performanca të vlerësuara në filma si “Chinatown”, “The Shining” dhe “Something’s Gotta Give”.

Por tani Douglas, me të cilin Nicholson bashkëpunoi në filmin e vitit 1975 “One Flew Over the Cuckoo’s Nest”, ka pohuar se ylli i kinemasë është “zhdukur” nga jeta publike dhe nuk është më i interesuar të aktrojë.

Kjo vjen pasi regjisori James L. Brooks, i cili shkroi skenarin e filmit të fundit të Nicholson, komedinë romantike të vitit 2010 “How Do You Know”, la të kuptohej vitin e kaluar se ishte “i sigurt se do ta shohim” përsëri duke luajtur. Por Douglas tani me sa duket e ka hedhur poshtë këtë sugjerim.

“Do të më kishte pëlqyer të kisha aktruar me Jack”, tha Douglas, 82-vjeç, të hënën në mbrëmje. “Ai nuk punon më. Është mirë. Është zhdukur. E di këtë.”

Douglas, i cili po promovonte librin e tij me kujtime në qytetin e lindjes së gruas së tij, Catherine Zeta Jones, shtoi: “Ende e takoj, por është mirë. Është atje lart pranë shtëpisë së tij dhe ecën me pantofla.”

Nicholson debutoi në ekran në filmin e vitit 1958, “The Cry Baby Killer”, përpara se të bënte një paraqitje të shkëlqyer në klasikun “Easy Rider” në vitin 1969, me “Five Easy Pieces”, “The Witches of Eastwick”, “ A Few Good Men”, “Batman and The Departed”, ndër filmat e tij të tjerë.

Nicholson nuk është pensionuar kurrë zyrtarisht, në vitin 2013 ai i tha Vanity Fair se ishte më pak i motivuar për të qenë “më atje jashtë”. Aktori është parë shumë rrallë vitet e fundit dhe vetëm herë pas here e ka parë ekipin e tij të dashur, Los Angeles Lakers – ai ka qenë mbajtës i biletës sezonale që nga viti 1970. ©LAPSI.al