Titulli i parë në elitë si trajner, Dede: Meritë e të gjithëve

E mori drejtimin e Egnatias në javën e 35-të të sezonit të rregullt dhe arriti që të shpallet kampion i Shqipërisë me vetëm 6 ndeshje në krye të skuadrës rrogozhinase. Trajneri Nevil Dede është padiskutim një nga protagonistët e suksesit të Egnatias, që për të tretin vit radhazi fiton kampionatin. Dede komenton këtë sukses dhe trofeun e tij të parë si trajner në RTSH.

“Kampion me 6 ndeshje? Duhet të jesh më shumë fat besoj. Në këtë botë Zoti ka disa ekuilibra të çuditshëm, kur nuk e pret merr një dhuratë të tillë. Demrozi dhe Egnatia na dhanë mundësi të luftonim për dy trofe, por ia dolëm me më të rëndësishmin. Mendoj se është meritë e presidentit Demrozi dhe e drejtorit Klejdi Zenelaj. Padyshim edhe të punës së Edlir Tetovës. Në Superiore trofeu i parë? Kur u ndërrua që ndeshjet do të luheshin në të njëjtën ditë, thashë “Nevil ka ardhur koha që të shpallesh kampion”. Emocionet janë të mëdha.

Unë besoj që kualiteti dhe cilësia e djemve në fushë dhe ndërtimi i skuadrës, gjithë ajo administratë e klubit, është ajo që solli suksesin. Unë pata mundësinë të bëja disa prekje të vogla, në motivim dhe në anën psikologjike. Unë kam fituar një kampionat me anën psikologjike. Ishim out-sider në fillim të Final Four dhe mendova që duhet të ishim të duruar dhe vrastarë.

Komplimentoj Dinamon që mbylli garën me dinjitet, ne e fituam dhe merituam titullin kampion.

Eksperienca që ka krijuar Egnatia, duhet të kalojë turin e parë të Champions League, e kam motiv për veten time, është minimumi, që të kemi shanset për grupe. Vitet kanë kaluar për Egnatian, eksperienca është marrë. Ky është objektiv i arritshëm. Pak fat duhet, sidomos te shorti”, ka thënë mes të tjerash Dede.