“Trialog” në RTSH”/ Luarasi: Ja pse protesta ndaj qeverisë për Zvërnecin është e pavend në këtë rast

Deputetja e Partisë Socialiste, Iris Luarasi, ka analizuar zhvillimet e fundit lidhur me protestat në Tiranë dhe Zvërnec, duke theksuar nevojën për një qasje racionale ndaj këtyre fenomeneve. E ftuar në emisionin “Trialog” në RTSH, nën moderimin e Alba Alishanit, ajo vlerësoi se ndonëse ka qytetarë që kanë arsye reale për të protestuar, rasti për Zvërncecin nuk është i duhuri.

Luarasi pranoi se qeverisja e gjatë mbart sfidat e saj, duke reflektuar mbi ndjeshmërinë e një pjese të protestuesve.

“Personalisht mendoj se kanë arsye për të protestuar për shumë gjëra, por kjo nuk më duket se është protesta e duhur. Të jesh 13 vite në pushtet ka kosto, ashtu si dhe ka njerëz që kanë arsye për të protestuar,” deklaroi Luarasi.

Dallimi mes Sazanit dhe Zvërnecit

Sipas deputetes socialiste, ekziston një keqkuptim thelbësor në lidhje me natyrën e pretendimeve në Zvërnec, të cilat ajo i cilësoi si çështje private. Ajo theksoi se diferenca midis pronës publike si Sazani dhe situatës në Zvërnec është thelbësore.

“Në Zvërnec është e drejta e banorëve të kenë pretendime. Por edhe ndaj pretendimeve se u është marrë toka me mashtrime, nuk mund ta zgjidhë këtë gjë qeveria, por drejtësia,” u shpreh ajo.

Luarasi u ndal edhe te pamjet e dhunshme në Zvërnec, duke vlerësuar reagimin institucional ndaj shkeljeve të policisë. Ajo theksoi se shteti ndërhyri duke shkarkuar zinxhirin e komandës së policisë së Vlorës dhe duke revokuar licencat e firmave private të sigurisë që u përfshinë në incidente.

Megjithatë, ajo ngriti pikëpyetje për organizimin e këtyre lëvizjeve:

“Jemi në momentin që duhet të shmangim emocionet dhe të shohim me vëmendje. Kemi një organizim të mirë organizuar për protestën dhe të superfinancuar,” deklaroi Luarasi.

Luarasi e mbylli komentin e saj duke theksuar se protestat kundër qeverisë janë legjitime në një demokraci, por ato duhet të bazohen mbi fakte dhe në përputhje me ligjin, duke shmangur përzierjen e çështjeve civile me ato politike.