U nda nga jeta në moshën 84-vjeçare, mbahen homazhe në nder të aktorit të shquar, Birçe Hasko

U mbajtën sot homazhet në nder të aktorit të njohur shqiptar, Birçe Hasko. Ashtu siç ishte njoftuar, homazhet u mbajtën në Akademinë e Arteve, ku morën pjesën personazhe të njohur të skenës shqiptare dhe jo vetëm, dashamirës dhe familjarë të aktorit. Pas homazheve, aktori do të përcillet për në banesën e fundit.

KUSH ISHTE BIRÇE HASKO
Birçe Hasko mbylli sytë dje përgjithmonë në moshën 84-vjeçare, duke lënë pas 32 role në kinematografi dhe 12 të tjerave në teatër, “Mjeshtri i Madh”
Artist në skenë dhe profesor që në gjenezë, artin skenik “Artisti i Merituar” e përcolli me mjeshtëri te breza të tërë studentësh në Akademinë e Arteve, ku shërbeu si pedagog dhe dekan për disa vite me radhë.

I lindur në Dukat, Birçe Hasko shërbeu si mësues dhe drejtor në shkollat e disa fshatrave në Vlorë e Tepelenë deri në vitin 1965, kur u shkëput për të kryer studimet e larta për aktor gjatë viteve 1965-1969 në Institutin e Lartë të Arteve. Në përfundim të studimeve, Hasko vijoi punën si pedagog i Mjeshtërisë së Aktorit në Akademinë e Arteve, duke mos iu ndarë asnjëherë mësimdhënies dhe skenës.

Me një plastikë të jashtëzakonshme, origjinal, elegant, i drejtpërdrejt, herë-herë shpotitës, hijerëndë e serioz, Birçe Hasko interpretoi në filmat: “Kur zbardhi një ditë” në rolin e ballistit Sulo, në “Malet me blerim mbuluar”, “Njeriu me top”, “Koncert në vitin 1936”, “Radiostacioni”, “Dhe vjen një ditë, “Përrallë nga e kaluara”, “Shkëlqim i përkohshëm”, “I dashur armik”, “Shi në plazh” etj.. Roli i tij i fundit është ai në filmin “Kronikë Provinciale” në vitin 2009.
Po ashtu, Birçe Hasko ka inskenuar shumë etyde, fragmente, si dhe 18 vepra dramatike të plota, duke përplotësuar kështu imazhin e artistit shumëdimensional.

<!– fillon sondazh

–>