UKRAINË – 10 të vrarë pas një sulmi ajror rus në verilindje

KIEV, 18 gusht /ATSH-AFP-DPA/ – Një sulm ajror rus në verilindje të Ukrainës ka vrarë të paktën 10 persona dhe ka plagosur tetë të tjerë, tha të martën kreu i administratës ushtarake të rajonit të Kharkiv, Oleg Synegubov.

”Sulmi ndodhi në një lokalitet rreth 60 kilometra nga qyteti i Kharkivit”, tha ai në Telegram duke shtuar se operacionet e shpëtimit janë ende duke u zhvilluar.

Edhe Moska dhe rajoni përreth u përballën me një valë sulmesh me dronë ukrainas gjatë natës, në atë që agjencia shtetërore ruse e lajmeve TASS e përshkroi si sulmin më të rëndë të tillë në dy vjet.

Kryebashkiaku i Moskës, Sergei Sobyanin, tha se 620 dronë kishin fluturuar drejt rajonit të kryeqytetit midis mbrëmjes së së hënës dhe mëngjesit të së martës.

”Shumica u kapën gjatë afrimit, ndërsa 180 të tjerë u rrëzuan mbi zonën e Moskës”, sipas TASS.

Shifrat nuk mund të verifikoheshin në mënyrë të pavarur.

Nuk pati raportime të menjëhershme për viktima ose dëme.

Ukraina ka nisur sulme në shkallë të gjerë me dronë në rajonin e Moskës pothuajse çdo ditë.