Universiteti i Malit të Zi nënshkruan memorandume me Logate dhe Solvership: bursa për studentët më të mirë

Në Rektoratin e Universitetit të Malit të Zi u nënshkruan sot memorandume bashkëpunimi me kompaninë Logate dhe Institutin Logate për Teknologji Informacioni, si dhe një memorandum për bursa të dedikuara studentëve më të mirë të këtij universiteti me kompaninë Solvership nga Podgorica, siç njofton RTCG.

Memorandumeve u vunë firmat rektori i Universitetit të Malit të Zi, prof. dr. Vladimir Božović, dhe drejtorët e kompanive, Ivica Tatar dhe prof. Goran Šuković. Sipas memorandumeve të përgjithshme të bashkëpunimit, parashikohet lidhja e komunitetit akademik me sektorin e IT-së përmes shkëmbimit të njohurive dhe përvojave, praktikave profesionale, mësimit praktik dhe mbështetjes mentoriale për studentët, si dhe bashkëpunimit në projekte shkencore-kërkimore, zhvillimore dhe inovative.

Në kuadër të programit “Bursa për më të mirët, puna tek më të mirët”, kompania Solvership do të ndajë bursa për studentët më të mirë të Universitetit të Malit të Zi dhe do t’u mundësojë atyre praktikë dhe aftësim profesional brenda kompanisë. “Është e rëndësishme që studentët tanë, përveç njohurive që marrin në Universitet, të kenë mundësinë të punojnë me njerëz dhe kompani që çdo ditë krijojnë dhe zbatojnë zgjidhje moderne teknologjike… Përmes programit të bursave ne mbështesim studentët më të mirë dhe u japim mundësinë që të zhvillohen profesionalisht që gjatë studimeve, të fitojnë përvojë dhe ta ndërtojnë të ardhmen e tyre në Malin e Zi”, tha rektori Božović.

“Ky bashkëpunim për ne është edhe një hap më afër studentëve dhe të rinjve… Si kompani që prej dy dekadash operon në industrinë e IT-së, studentëve mund t’u ofrojmë kontakt të drejtpërdrejtë me profesionin dhe përvojë pune në një mjedis real biznesi”, tha Tatar. “Përmes bashkëpunimit me Universitetin e Malit të Zi, Instituti Logate dëshiron t’u japë studentëve më shumë mundësi për të mësuar edhe jashtë auditorit. Planifikojmë t’i përfshijmë në praktika profesionale dhe mësim praktik, të organizojmë punëtori, trajnime dhe ligjërata të ekspertëve nga praktika, si dhe t’u ofrojmë mbështetje mentoriale”, tha prof. Šuković.

Në takim morën pjesë gjithashtu Marina Banović, këshilltare e rektorit për çështje ekonomike dhe financiare, Đorđije Malović, drejtues i zhvillimit të biznesit në kompaninë Logate, dhe Lidija Lakić, drejtore e Qendrës së Komunikimit dhe PR të UCG-së.