Veliaj kërkon lirinë me garanci pasurore, rekurs në Gjykatën e Lartë – Tv Klan

Kryetari i Bashkisë së Tiranës, Erion Veliaj, ka dorëzuar rekurs në Gjykatën e Lartë, duke kërkuar ndryshimin e masës së sigurisë ndaj tij.

Siç raporton gazetarja e Klan News, Glidona Daci, ai e ka paraqitur kërkesën më 6 maj, duke kërkuar që masa e “arrestit në burg” të hiqet dhe të zëvendësohet me një masë më të butë, si garanci pasurore ose detyrim për paraqitje periodike në organet përkatëse.

Kryebashkiaku ishte dje prezent në seancën që u zhvillua në Gjykatën Administrative, ku u shqyrtua padia e tij ndaj prokurorit të SPAK, Ols Dado. Ai kërkon pavlefshmërinë e dekretit të vitit 2008 të presidentit të Republikës së asaj kohe (Bamir Topi), për emërimin e prokurorit.

Megjithatë, gjykata, duke marrë parasysh që pala e paditur (KLP) paraqiti prapësimet e reja në këtë seancë dhe mbrojtja e Veliajt kërkoi kohë për t’u njohur me provat, vendosi që seanca të shtyhet për më 19 qershor, në orën 14:00. (Për gjithçka ndodhi në sallë dhe jashtë saj: kliko KËTU!)

Ai ndodhet në qeli që prej 10 shkurtit 2025. Mbi të rëndojnë akuzat për korrupsion pasiv në 9 raste, pastrim parash, mosdeklarim pasurie, shpërdorim detyre dhe futja e sendeve në burg, akuza që janë hedhur poshtë prej tij.