Vuçiç: Kosova çështja më e vështirë e karrierës time — dy vitet e fundit mes më të rëndave për shkak të përpjekjes për “revolucion me ngjyra”

Presidenti i Serbisë dhe bartësi i listës “Serbia e Bashkuar” për zgjedhjet parlamentare, Aleksandar Vuçiç, ka deklaruar se Kosova dhe Metohia ka qenë çështja më e vështirë me të cilën është përballur gjatë karrierës së tij politike. Deklarata u bë në shkrimin autorial “30 vitet e mia në politikë”, të botuar në numrin e sotëm të gazetës “Blic”, me rastin e 30-vjetorit të kësaj gazete.

Sipas tij, dy vitet e fundit kanë qenë “ndër vitet më të vështira të jetës së tij politike”, për shkak të asaj që ai e përshkruan si përpjekje për “revolucion me ngjyra dhe luftë hibride kundër Serbisë”.

Vuçiç shkruan se gjatë gjithë kohës ka punuar për ruajtjen e paqes, por pa e poshtëruar kurrë Serbinë. Ai përmend presionet me të cilat thotë se është përballur — rreth Srebrenicës, luftës në Ukrainë dhe kërkesave për vendosjen e sanksioneve ndaj Rusisë.

Në shkrimin autorial, presidenti serb kujton edhe fillimet e tij në politikë: hyrjen në Partinë Radikale Serbe në vitin 1993, në moshën 23-vjeçare, si dhe postin e ministrit të informacionit në vitin 1998. Ai pranon se shumë gjëra do t’i bënte ndryshe sot.

Vuçiç shton se ndoshta është ndër të paktët politikanë serbë që ka kaluar pothuajse po aq kohë në pushtet sa edhe në opozitë.

Burimi: Danas