Waitz në Shkup: Ajri i pastër, sundimi i ligjit dhe kushtet e mira të jetesës — parakusht për përparimin drejt BE-së

SHKUP – Eurodeputeti austriak Thomas Waitz deklaroi në Shkup se përparimi i Maqedonisë së Veriut është i nevojshëm për vetë vendin, jo vetëm për rrugën drejt anëtarësimit në Bashkimin Europian. Ai foli në Forumin Qytetar “Maqedonia e Veriut dhe e ardhmja e Europës: Qytetarët në zemër të zgjerimit të BE-së”, të organizuar nga Grupi për Mbështetjen e Demokracisë dhe Koordinimin e Zgjedhjeve të Parlamentit Europian, në bashkëpunim me Kuvendin e Maqedonisë së Veriut.

“Mendoj se përparimi ju nevojitet juve, vendit tuaj”, u shpreh Waitz, duke theksuar se vendi duhet të zhvillohet si një shoqëri moderne, demokratike dhe e mirëorganizuar — pavarësisht nëse një ditë do t’i bashkohet BE-së apo jo.

Ndër temat kryesore që ai renditi ishin ajri i pastër dhe mbrojtja e mjedisit, deponitë e egra, riciklimi, trajtimi i ujërave të zeza, minierat, pylltaria dhe sundimi i ligjit. Eurodeputeti paralajmëroi se qytetarët do ta kërkojnë një jetë më të mirë diku tjetër, nëse vendi i tyre nuk ua ofron atë.

Ndërkaq, kryetari i Kuvendit, Afrrim Gashi, theksoi se anëtarësimi në BE është një angazhim i qartë strategjik, mbi partiak, dhe se agjenda europiane duhet të kthehet në një agjendë qytetare. Eurodeputeti sllovak Branislav Ondruš vuri në dukje ndryshimin e sloganit të Delegacionit të BE-së, nga “BE për ju” në “BE me ju”.

Burimi: Libertas