Zëvendës-shefi i misionit britanik në OSBE: Serbia duhet të respektojë vendimet e gjykatave — lavdërimi i krimeve minon stabilitetin rajonal

Zëvendës-shefi i Misionit të Delegacionit të Mbretërisë së Bashkuar pranë OSBE-së, Xhejms Ford, ka deklaruar se zbutja dhe paraqitja në dritë të favorshme e krimeve të Ratko Mlladiçit përbën fyerje ndaj të drejtës ndërkombëtare dhe ka bërë thirrje që qeveritë dhe liderët politikë të shmangin mohimin apo revizionizmin e krimeve.

Sipas Fordit, si komandant ushtarak, Mlladiçi drejtoi operacionet gjatë të cilave u kryen krime ndër më të rëndat në Evropë që nga Lufta e Dytë Botërore; një tribunal i pavarur i OKB-së e dënoi për gjenocid, krime kundër njerëzimit dhe krime lufte. Mohimi dhe zbutja e krimeve të tij dëmtojnë drejtpërdrejt stabilitetin rajonal dhe besimin.

Tribunali Penal Ndërkombëtar për ish-Jugosllavinë u themelua nga Këshilli i Sigurimit i OKB-së dhe Serbia, si nënshkruese e Marrëveshjes së Dejtonit, është e detyruar të respektojë vendimet e tij dhe të kontribuojë konstruktivisht për paqen në Bosnje e Hercegovinë dhe rajon.

“Mbretëria e Bashkuar mbetet e palëkundur në qëndrimin se nuk duhet të ketë vend për mohimin e gjenocidit apo lavdërimin e kriminelëve të luftës… Mendimet e Qeverisë së Mbretërisë së Bashkuar janë me viktimat e krimeve të Mlladiçit dhe familjet e tyre”, thuhet në deklaratën e publikuar në faqen e qeverisë britanike.

Në fund, Ford thekson se në këtë moment të ndjeshëm për Ballkanin Perëndimor është kyçe që të gjitha qeveritë dhe liderët politikë të respektojnë pavarësinë e proceseve gjyqësore dhe faktet e konstatuara.

Burimi: Danas