20-vjetori i Eurorajonit Adriatiko-Jonian, Balla: Për Shqipërinë, bashkëpunimi rajonal mbetet zgjedhja jonë strategjike

Në kuadër të 20-vjetorit të Eurorajonit Adriatiko-Jonian, kreu i grupit parlamentar socialist, Taulant Balla, ka theksuar rëndësinë e bashkëpunimit mes vendeve të rajonit dhe rolin e Shqipërisë në këtë proces.

“Unë kam besimin se si kryetar i delegacionit shqiptar në PE do kem mundësinë të ulemi përkrah kolegëve të Parlamentit Europian përpara se kjo legjislaturë të mbyllet në 2029, të paktën me statusin e anëtarit të asociuar. Ky 20-vjetor është moment i shquar dhe dua t’i shpreh në emër të Kuvendit mirënjohje ndaj atyre që kanë ndihmuar në ndërtimin e kësaj hapësire dialogu mes vendeve të rajonit që lagin dy detet Adriatik dhe Jon”, u shpreh Balla.

Ai e cilësoi këtë përvjetor si një moment reflektimi për arritjet e deritanishme dhe mundësitë e reja për të ndërtuar vizionin e së ardhmes së rajonit.

“Për Shqipërinë, bashkëpunimi rajonal mbetet zgjedhja jonë strategjike. Jemi i vetmi vend në rajon që kemi përshtatur 100% politikën tonë të jashtme me BE. Vlerësojmë se fqinjësia e mirë, zbatimi i qëndrueshëm dhe bashkëpunimi kufitar janë thelbësor për paqen, stabilitetin dhe mirëqenien e qytetarëve”, shtoi ai.