Abissnet Superiore: Gvozdenoviç do fitoren e parë në “Final Four”: Me Dinamon duam tri pikët, harrojmë rezultatet negative!

Për AF Elbasanin përballja me Dinamo City është një duel kyç sa i përket aspiratave për titull. Një gjë të tillë e ka theksuar edhe trajneri i verdhebluve, Ivan Gvozdenoviç, në konferencën për shtyp të së shtunës. Tekniku në fjalë beson se skuadra e tij do të marrë tri pikët ndaj Dinamos pasi vetëm kështu rifutet në garë për titull si dhe kalon ngërçin e katër takimeve të fundit.

“Duhet të kalojmë këtë moment dhe ne e dimë fare mirë se kjo ndodh nëse marrim një fitore në takimin e radhës. Ndeshja me Egnatian ishte shumë larg pritshmërive”, pranoi Ivan Gvozdenoviç.

Në fund, ai ndalet edhe tek rënia që pati Elbasani në këto katër javë të fundit. “Mendoj se kemi humbur disi nga shkëlqimi që kishim deri në muajin prill. Tani na duhet që të qëndrojmë të bashkuar pasi jemi ende në garë për titull”, tha trajner i AF Elbasani.

Në fund ai bëri me dije se për takimin e radhës portieri Martin Janaçek dhe kapiteni Bruno Lulaj kanë shanse që të jenë në fushë në ndeshjen me Dinamon, e cila vjen për publikun shqiptar, të dielën (24 maj), nëpërmjet ekranit të RTSH Sport HD duke nisur prej orës 19:00.