Akademia e Shkencave kujton Johann Georg von Hahn, themeluesin e albanologjisë moderne

Akademia e Shkencave e Shqipërisë kujtoi sot, në përvjetorin e lindjes, diplomatin austriak dhe albanologun Johann Georg von Hahn (1811–1869), i konsideruar themeluesi i albanologjisë moderne dhe një nga studiuesit më të rëndësishëm të gjuhës, historisë dhe kulturës shqiptare.

Hahn lindi më 11 korrik 1811 në Frankfurt am Main të Gjermanisë dhe gjatë veprimtarisë së tij diplomatike në Ballkan ndërmori studime të gjera mbi shqiptarët, duke mbledhur materiale për historinë, filologjinë dhe folklorin e tyre.

Sipas Akademisë së Shkencave, vepra e tij më e njohur, “Albanesische Studien” (“Studime shqiptare”), e botuar në vitin 1854, konsiderohet një gur themeli i albanologjisë, pasi për herë të parë paraqiti në mënyrë të argumentuar tezat mbi autoktoninë e shqiptarëve, prejardhjen e tyre ilire dhe përkatësinë e gjuhës shqipe në familjen indoevropiane.

Akademia vlerëson gjithashtu kontributin e Hahn-it në hartimin e fjalorit shqip-gjermanisht, të përfshirë në vëllimin e tretë të “Albanesische Studien”, i cili përmban 6 216 fjalë të gjuhës shqipe dhe dokumenton leksikun e gjysmës së parë të shekullit XIX. Ky fjalor mbetet një burim me rëndësi të veçantë për studimet dialektologjike dhe etimologjike.

Gjatë shërbimit si nënkonsull i Austrisë në Janinë, Hahn bashkëpunoi me intelektualë shqiptarë, mes tyre Kostandin Kristoforidhi dhe Apostol Meksi, ndërsa dokumentoi edhe alfabetin e vjetër të Dhaskal Todrit në Elbasan.

Sipas Akademisë së Shkencave, kontributet shkencore të Johann Georg von Hahn u shfrytëzuan më pas nga ideologët e Rilindjes Kombëtare në mbështetje të vetëdijesimit kombëtar dhe argumentimit të së drejtës historike të shqiptarëve për shtet të pavarur. Profesor Eqrem Çabej e ka vlerësuar Hahn-in si themeluesin e albanologjisë në kuptimin e mirëfilltë shkencor të fjalës.