Aksion antidrogë në Kumanovë: Katër persona në pranga, sekuestrohen pako me lëndë të bardhë

Katër persona janë ndaluar në Kumanovë në natën mes të premtes dhe të shtunës, rreth orës 00:50, në një aksion kundër tregtisë së paligjshme të drogës dhe armëve. Operacioni u realizua nga zyrtarët policorë të Departamentit për tregtinë e paligjshme të drogës dhe armëve pranë SPB Kumanovë, së bashku me ekipin mobil «Task Force».

Të ndaluarit janë R.S. (45) nga Kumanova, T.K. (45) nga fshati Romanovcë i Kumanovës, N.A. (39) nga Kumanova dhe gruaja 39-vjeçare M.K. nga fshati Biljanovcë i Kumanovës. Me urdhër të gjykatës u krye bastisje në banesën e R.S.-së, ku në atë moment ndodheshin edhe tre personat e tjerë.

Gjatë bastisjes u gjetën disa pako me lëndë të bardhë në formë guri, si dhe sende të tjera të rëndësishme për procedurën. Të katër personat u shoqëruan në stacionin policor.

Po ndërmerren masa për zbardhjen dhe dokumentimin e plotë të rastit, dhe pas përfundimit të dokumentimit do të parashtrohen kallëzimet përkatëse pranë institucioneve kompetente.

Burimi: Skopje1