Amal Clooney: Martesa me George Clooney më ndryshoi jetën

Amal Clooney ka pranuar se jeta e saj ndryshoi ndjeshëm pasi u martua me aktorin e njohur George Clooney, duke e bërë më të vështirë ruajtjen e privatësisë.

Avokatja e njohur për të drejtat e njeriut, 48 vjeçe, foli për këtë gjatë një aktiviteti Cartier Dialogues në Bangkok.

“Ishte më e lehtë kur mund të vendosja vetë se sa ekspozim do të kisha,” u shpreh Amal, duke shtuar se përballja me famën që solli martesa ishte një eksperiencë krejtësisht e re.

Ajo tregoi se më parë arrinte ta mbante të ndarë jetën personale nga karriera profesionale.

“Ishte një fenomen i çuditshëm. Dikur jeta ime profesionale dhe ajo private ishin të ndara dhe nuk përziheshin. Por pasi u martova, kjo ndryshoi shumë,” tha ajo.

Amal rrëfeu se në fillim ishte shumë e kujdesshme me imazhin e saj publik.

“Mendoja se nuk mund të vishja një fustan të caktuar apo të shfaqesha në një event, sepse të hënën do të isha para një gjyqtari. Por me kalimin e kohës kuptova se kjo nuk ka aq rëndësi sa të jetosh jetën tënde.”

Sipas saj, ajo që ka vërtet rëndësi është profesionalizmi.

“Nëse je i mirë në atë që bën, kjo do të duket pavarësisht gjithçkaje tjetër,” u shpreh ajo.

Megjithatë, Amal theksoi se nuk ka lejuar kurrë që fama ta pengojë të bëjë gjërat që janë të rëndësishme për familjen dhe marrëdhënien e saj.

Amal dhe George Clooney u martuan në vitin 2014 në një ceremoni madhështore në Itali. Çifti janë prindër të binjakëve Ella dhe Alexander, të cilët janë 9 vjeç.

Nga ana e tij, George Clooney ka deklaruar vazhdimisht se gjatë më shumë se një dekade martesë, ai dhe Amal nuk kanë pasur asnjëherë një debat serioz.

Ndërkohë, Amal ka vlerësuar gjithmonë mbështetjen e bashkëshortit të saj për karrierën.

“Kam një partner jete që më mbështet plotësisht në punën që bëj. Nuk ndihem sikur duhet të kërkoj falje apo të kufizoj ambiciet e mia,” ka thënë ajo në një intervistë të mëparshme.