Begaj mesazh për sesionin e ri parlamentar: Përgjegjësia ndaj Shqipërisë është e përbashkët

Presidenti i Republikës, Bajram Begaj, ka përcjellë një mesazh me rastin e nisjes së sesionit të ri parlamentar, duke u bërë thirrje deputetëve për bashkëpunim, dialog dhe përgjegjshmëri në përmbushjen e detyrave ndaj vendit dhe qytetarëve.

Begaj theksoi se një demokraci e konsoliduar nuk përcaktohet nga mungesa e dallimeve politike, por nga mënyra se si ato përballohen, duke nënvizuar se Kuvendi është institucioni ku debatet duhet të zhvillohen përmes argumenteve.

“Një demokraci e konsoliduar nuk përcaktohet nga mungesa e dallimeve. Përkundrazi, ajo dallohet nga mënyra se si i përballon ato. Dallimet politike bashkëjetojnë me demokracinë dhe Kuvendi është vendi ku ato duhet të shprehen, të debatohen dhe të përballen me argumente”, u shpreh Presidenti.

Begaj vlerësoi gjithashtu rëndësinë e protestës paqësore dhe shprehjes së lirë të mendimit, duke i cilësuar ato pjesë të natyrshme të jetës demokratike.

“Protesta paqësore dhe shprehja e lirë e mendimeve janë pjesë e natyrshme e jetës demokratike. Jo gjithmonë do të kemi të njëjtat qëndrime dhe jo çdo kërkesë mund të gjejë të njëjtën përgjigje. Është inkurajuese kur zëri i qytetarëve gjen hapësirë në debatin publik dhe merr vëmendjen e institucioneve. Sfida jonë e përbashkët është që kjo energji qytetare dhe ky angazhim institucional të ushqejnë një dialog që forcon besimin dhe ndihmon në gjetjen e zgjidhjeve më të mira”, shkruan ai.

Në mesazhin e tij, Presidenti renditi edhe disa prej sfidave dhe objektivave kryesore të vendit, duke përmendur sigurinë kombëtare, shtetin e së drejtës, zhvillimin ekonomik, luftën kundër krimit të organizuar dhe korrupsionit, reformën territoriale dhe të ardhmen europiane të Shqipërisë.

Begaj u ndal veçanërisht te procesi i integrimit në Bashkimin Europian, duke e cilësuar atë si një projekt kombëtar që kërkon vazhdimësi, bashkëpunim dhe përgjegjësi të përbashkët.

“Mandatet dhe bindjet politike janë të ndryshme, por përgjegjësia ndaj Shqipërisë është e përbashkët”, theksoi Presidenti.

Sa i përket reformës në drejtësi, Begaj tha se konsolidimi i saj mbetet një nga përgjegjësitë më të rëndësishme të shtetit shqiptar, ndërsa i cilësoi rezultatet e SPAK-ut si një nga arritjet më të rëndësishme të reformës.

Në përfundim, Presidenti uroi që sesioni i ri parlamentar të shërbejë për forcimin e institucioneve, rritjen e besimit të qytetarëve te politika dhe shteti, si dhe afrimin e Shqipërisë me Bashkimin Europian.