BEJRUT – Libani heq dënimin me vdekje, vendi i parë arab që e ndalon

BEJRUT, 11 gusht /ATSH-DPA/- Parlamenti i Libanit miratoi sot një ligj historik që shfuqizon dënimin me vdekje dhe e zëvendëson atë me burgim të përjetshëm, duke e bërë Libanin vendin e parë arab që e heq zyrtarisht dënimin kapital.

Ligji u miratua me shumicën e votave në parlamentin me 128 anëtarë, ndërsa blloku parlamentar i Hezbollahut votoi kundër.

Ministri i Drejtësisë, Adel Nassar, e cilësoi vendimin si një “hap historik” për Libanin.

Sipas ligjit të ri, personat që kanë kryer krime para hyrjes së tij në fuqi do të dënohen me burgim të përjetshëm, ndërsa për veprat e kryera pas hyrjes në fuqi parashikohet burgim i përjetshëm i rënduar.

Nisma ishte paraqitur në parlament në tetor 2025 dhe ishte mbështetur nga shtatë deputetë nga grupe të ndryshme politike.

Heqja e dënimit me vdekje vjen pas vitesh fushate nga organizatat libaneze dhe ndërkombëtare për të drejtat e njeriut.

Edhe pse ekzekutimet në Liban janë pezulluar de facto që nga viti 2004, dënimi me vdekje vazhdonte të ishte pjesë e legjislacionit.

Komisioni Kombëtar për të Drejtat e Njeriut kishte kërkuar vazhdimisht heqjen e tij, duke argumentuar se sistemi penal duhet të respektojë dinjitetin njerëzor dhe të synojë rehabilitimin. /Ad.Ab./ a.jor.