Berisha: Të rinjtë dhe gratë do të kenë rol kyç në ripërtëritjen e PD-së. Mbështesim rrugën drejt BE

Kryetari i Partisë Demokratike, Sali Berisha, deklaroi se PD-ja ka nevojë për një riorganizim të plotë, duke theksuar se të rinjtë dhe gratë do të kenë një rol të rëndësishëm në procesin e ripërtëritjes së partisë.

“PD për t’u ripërtërirë ka nevojë për një riorganizim të plotë. Instituti Amerikan ka përgatitur një platformë të detajuar për ripërtëritjen dhe ne do ta respektojmë deri në detaj. Në këtë ripërtëritje do të bëjmë gjithçka për ta hapur partinë në të gjitha nivelet, duke njohur edhe defektet dhe problemet tona. Të rinjtë janë gjëja më e çmuar e PD-së. Gratë janë shumica, jo vetëm numerike, por edhe intelektuale e kombit sot. Është një potencial i jashtëzakonshëm për t’u vënë në shërbim të shoqërisë”, deklaroi Berisha.

Ai shtoi se Partia Demokratike mbetet e angazhuar në proceset integruese të vendit, duke kujtuar rolin që ka luajtur ndër vite në afrimin e Shqipërisë me strukturat euroatlantike.

Berisha: Integrimi në BE mbetet ylli polar i Partisë Demokratike

Kryetari i Partisë Demokratike, Sali Berisha, ritheksoi gjatë punimeve të Kuvendit Kombëtar se integrimi i Shqipërisë në Bashkimin Europian mbetet një nga objektivat kryesore të demokratëve.

Në fjalën e tij, Berisha u shpreh se Partia Demokratike do të vazhdojë të mbështesë pa lëkundje rrugën europiane të vendit, duke e cilësuar anëtarësimin në BE si “yllin polar” që udhëheq programin dhe vizionin e saj politik.

“Ne qëndrojmë të pamposhtur në përpjekjen për integrimin e Shqipërisë në BE. Ai është ylli polar i yni. Ky integrim duhet të bazohet para së gjithash në meritë. Nga vendet që kërkojnë integrim nuk kërkohen ligje dhe kërkesa që cënojnë qytetarët”, tha Berisha.