Biberaj: Studentët po mendojnë krijimin e një force të re politike, pedagogët do t’i mbështesin

Pedagogu Aleksandër Biberaj i doli në mbështetje protestës së studentëve, duke vlerësuar vendosmërinë e të rinjve për të vijuar rezistencën deri në plotësimin e kërkesave të tyre, pavarësisht kostove. Siç njofton BalkanWeb, i ftuar në studion e News24, Biberaj deklaroi se kryeministri Edi Rama nuk mund të mbahet në pushtet përmes forcave të policisë dhe se protesta do të vazhdojë, edhe nëse mund të ndryshojnë format e saj të organizimit.

Sipas tij, studentët po shqyrtojnë mundësinë e krijimit të një lëvizjeje të re politike, e cila mund të gëzojë mbështetje të gjerë qytetare. Ai iu referua disa sondazheve, sipas të cilave një forcë e re politike, nëse do të krijohej, do të ishte aktualisht më e popullarizuara në Shqipëri.

“Studentët po e bluajnë këtë ide. Kur ta kenë gatuar, do të kenë mbështetjen tonë”, u shpreh Biberaj, duke e cilësuar lëvizjen si një lëvizje mbi palët politike, me mbështetje të jashtëzakonshme qytetare.

Pedagogu shtoi se do t’i mbështesë studentët në këtë rrugë dhe se të njëjtin qëndrim ndajnë edhe kolegët e tij. Sipas tij, në takimet mes pedagogëve ka pasur pajtim pa rezerva, ndërsa shqetësimi i vetëm mbetet që partitë politike të mos ndërhyjnë për ta përçarë lëvizjen studentore.