BM – Lideri i “Reform UK”, Farage përballet me akuza të reja për mosdeklarim përfitimesh

– Lideri i partisë britanike kundër emigracionit, Nigel Farage është paraqitur pranë autoritetit parlamentar, që mbikëqyr standardet etike të deputetëve, pas pretendimeve se nuk ka deklaruar disa përfitime, që ka marrë para se të zgjidhej deputet.

Sipas gazetës “The Sunday Times”, Farage ka përfituar shërbime sigurie, mbështetje për rrjetet sociale dhe akomodim nga aleati i tij i ngushtë, George Cottrell gjatë vitit para zgjedhjeve parlamentare të vitit 2024.

Zëdhënësi i Farage i ka mohuar akuzat, duke i cilësuar ato si “të pabaza” dhe duke deklaruar se nuk është shkelur asnjë rregull i Parlamentit.

Megjithatë, deputeti i Liberal Demokratëve, Josh Babarinde, i ka kërkuar zyrtarisht Komisionerit Parlamentar për Standardet të hapë një hetim të ri, duke argumentuar se ekzistojnë dyshime serioze, se Farage nuk ka respektuar detyrimin për të deklaruar përfitimet e marra.

Farage është tashmë nën hetim

Kjo nuk është hera e parë që, Farage përballet me një hetim të tillë. Ai është tashmë nën hetim, për një dhuratë prej 5 milionë paundësh (rreth 6,7 milionë dollarë) që ka marrë nga investitori i kriptomonedhave Christopher Harborne, para se të zgjidhej deputet.

Farage ka deklaruar se, paratë ishin një dhuratë pa kushte, e destinuar për financimin e sigurisë së tij personale, dhe për këtë arsye nuk ishin të detyruara të deklaroheshin.

Megjithatë, kjo shumë u bë publike vetëm pasi u zbulua nga media në muajin prill.

Çfarë mund të ndodhë?

Nëse autoriteti parlamentar arrin në përfundimin se Farage, ka shkelur rëndë rregullat për deklarimin e interesave financiare, ai mund të pezullohet nga Parlamenti britanik.

Nëse pezullimi zgjat 10 ditë ose më shumë, në zonën që ai përfaqëson, mund të nisë një procedurë për t’i hequr mandatin, e cila mund të çojë në zgjedhje të parakohshme për vendin e tij në Parlament. /