Botohet libri “100 vjet teatër në Shkodër (1879-1979)”

Libri “100 vjet teatër në Shkodër: 1879–1979”, me autor Andrea Skanjeti dhe i botuar nga Akademia e Shkencave (ASHSH), është një vepër monumentale që përmbledh një shekull histori të teatrit në Shkodër, një nga qendrat më të rëndësishme kulturore në Shqipëri.

Në përgatitjen e tij për botim ndihmoi akademiku dhe dramaturgu Stefan Çapaliku.

Autori Andrea Skanjeti përfshin në botim një numër të madh aktorësh dhe regjisorësh të njohur nga Shkodra, të cilët kanë kontribuar në zhvillimin e skenës teatrore në qytet. Ai gjithashtu sjell skena të njohura nga shfaqje të ndryshme dhe ndodhi të rëndësishme kulturore që kanë shënjuar rrugëtimin e teatrit në këtë qytet.

Teatri në Shkodër ka një histori të pasur që daton që në fund të shekullit XIX. Qyteti, një qendër kulturore dhe arsimore, u bë vendi ku për herë të parë filluan shfaqjet teatrore në Shqipëri, të mbështetura nga entuziastë lokalë dhe intelektualë që synonin zhvillimin e artit dhe kulturës në një kohë kur Shqipëria ishte ende nën sundimin osman.

Akademia e Shkencave u shpreh se, ky botim është një dëshmi e rëndësishme për çdo studiues apo adhurues të historisë së artit dhe kulturës shqiptare. Ai përfaqëson një përmbledhje të kujtimeve, përvojave dhe ngjarjeve që kanë ndihmuar në formimin e identitetit kulturor të qytetit të Shkodrës dhe të vetë Shqipërisë.