BRUKSEL – BE: Kërcënimet e Rubios ndaj ICC-së të papranueshme

BRUKSEL, 14 korrik /ATSH-ANSA/ – Si Bashkim Evropian, ne konfirmojmë mbështetjen tonë për Gjykatën Ndërkombëtare Penale (ICC) dhe parimet e mishëruara në Statutin e Romës dhe ne respektojmë pavarësinë dhe paanshmërinë e Gjykatës, tha sot një zëdhënës i Komisionit të BE-së në konferencën e përditshme për shtyp duke komentuar kërcënimet nga sekretari i Shtetit i SHBA-së, Marco Rubio.

”Ne jemi të përkushtuar fuqimisht ndaj drejtësisë penale ndërkombëtare dhe luftës kundër pandëshkueshmërisë. Sulmet ose kërcënimet kundër Gjykatës, zyrtarëve ose stafit të saj janë thjesht të papranueshme”, shtoi ai.

”Ne kujtojmë se ICC-ja uk i shënjestron shtetet, as nuk përbën kërcënim për sovranitetin e tyre”, përfundoi zëdhënësi.

Sekretari i Departamentit amerikan të Shtetit, Marco Rubio ka nisur një sulm të ashpër ndaj Gjykatës Ndërkombëtare Penale (ICC), duke e akuzuar atë se kërkon të bëhet “arbitri i papërgjegjshëm i një ligji të ri global”.

Në një video të postuar në mediat sociale, sekretari i Shtetit i SHBA-së akuzoi GJPN-në se kërkon të “gjykojë dhe arrestojë qytetarët tanë sipas dëshirës dhe të kërcënojë sovranitetin amerikan”, duke paralajmëruar se Shtetet e Bashkuara do t’i “mësojnë asaj kuptimin e plotë të vendosmërisë amerikane”.

Ndër opsionet që po shqyrtohen nga Uashingtoni janë revokimi i vizave, rritja e sanksioneve kundër Gjykatës dhe presioni diplomatik mbi kombet e tjera për t’u tërhequr./  a.jor.