BRUKSEL – Ministrat e Brendshëm të BE-së miratojnë rregulla të reja për dëbimin e migrantëve

LUKSEMBURG, 1 tetor /ATSH-DPA/ – Ministrat e Brendshëm të Bashkimit Evropian dhanë sot miratimin përfundimtar për legjislacionin e ri që synon të rrisë dëbimin e migrantëve, ndërsa disa vende anëtare kërkojnë masa më të ashpra pas kalimit masiv të kufirit në enklavën spanjolle të Ceutës në fund të korrikut.

Legjislacioni i miratuar krijon bazën ligjore për ngritjen e qendrave të dëbimit jashtë BE-së, për migrantët që kanë detyrim ligjor të largohen nga blloku, por që nuk mund të kthehen në vendet e tyre të origjinës.

Rregullat e reja parashikojnë gjithashtu detyrime të reja dhe masa ndëshkuese të mundshme për azilkërkuesit, kërkesat e të cilëve janë refuzuar, si dhe zgjerojnë mundësinë e mbajtjes në paraburgim të personave që konsiderohen rrezik për sigurinë kombëtare, deri në dëbimin e tyre.

Në takimin në Luksemburg, ministrat e Brendshëm të BE-së diskutuan gjithashtu pasojat e kalimit masiv të kufirit në fund të korrikut, kur rreth 72 mijë migrantë mbërritën në Ceuta brenda pak ditësh, duke shkaktuar një krizë diplomatike dhe përplasje mes vendeve anëtare të BE-së lidhur me përgjegjësinë për situatën.

Në shtator, presidentja e Komisionit Evropian, Ursula von der Leyen, njoftoi një kuadër të ri evropian për reagimin ndaj krizave.

Ai do të mundësonte devijime të përkohshme nga rregullat e azilit në rastet kur flukset migratore do të ishin të organizuara dhe do të përdoreshin kundër BE-së.

Detajet e propozimit ende nuk janë paraqitur, por disa ministra evropianë kanë kërkuar kufizime të mëtejshme.

Ministri i Brendshëm gjerman Alexander Dobrindt mbështeti idenë e vendosjes së rregullave të posaçme të azilit për situata krize.

Sipas tij, mund të ketë raste kur nuk do të ishte e nevojshme të zbatoheshin procedurat standarde të azilit. /Ad.Ab./ a.jor.