Byroja e Kuvendit përjashton Palokën për 5 ditë nga jeta parlamentare

Byroja e Kuvendit vendosi të hënën përjashtimin me pesë ditë nga veprimtaria parlamentare të kryetarit të grupit të PD-së, Edi Paloka, pas incidenteve të ndodhura në seancën e fundit plenare, mes tij dhe ministrit të Shëndetësisë, Ilir Beqaj.
Byroja u mblodh paraditen e së hënës për të  shqyrtuar kërkesën e grupit të PS-së që kërkonte  marrjen e masës disiplinore ndaj Palokes për shkak të fjalorit joparlamentar dhe ndërmarrjes së sulmit personal ndaj ministrit Beqaj, gjatë seancës plenare.

Seanca e 17 nëntorit u shoqërua me tensione dhe debate të forta mes deputetëve të të dyja palëve, gjë që detyroi drejtuesen Valentina Leskaj të përjashtojë nga punimet e parlamentit deputetin demokrat, Flamur Noka, për thyerje të rregullores së Kuvendit.

Spaho:Do vazhdojmë të bëjmë opozitën në Kuvend; vendimi nuk ishte surprizë  

Përfaqësuesi i Partisë Demokratike në Byro, Edmond Spaho, nënkryetar i Kuvendit, tha se vendimi për përjashtimin e Palokës nuk e surprizoi opozitën. Byroja parlamentare, sipas tij, është kthyer në ‘plotësuese të tekave të grupit të PS-së, përmes mekanizmit të votës”. Por, kështu si po veprojnë po e keqadministrojnë, shtoi ai.
Seancat e Kuvendit, sipas Spahos, janë kthyer në vendin ku opozitës i pritet e drejta e fjalës. Edhe incidenti i ndodhur séancën e ditës së enjte ishte rrjedhojë e prerjes së fjalës së deputetëve të PD-së.
Spaho tha se PD do të vazhdojë të bëjë opozitën në Kuvend dhe se ky rast nuk do ta ndryshojë qëndrimin e mbajtur në seancën e fundit. Kemi të drejtën tonë për t’u shprehur në seancë, theksoi ai.