Dako reagon ndaj akuzave: Gati të ballafaqohem me Bashën

Sipas tij, këto janë përpjekje të dëshpëruara të PD që nuk mori kurrë Durrësin dhe që tani po bie në rënie të lirë gjithnjë e më poshtë.

“E vetmja gjë qe nuk bëj dot për Lulzimin dhe partinë e tij është të fitojnë Durrësin, të cilin e kanë humbur thellë dhe më thellë, duke rënë poshtë dhe më poshtë në gropën që janë munduar të më hapin mua”, ka thënë Dako.

Gjithë të tjerat me këtë lloj soji, për kryebashkiakun e qytetit bregdetar, janë humbje kohe. “Keqardhje për gjithë ata që dëgjojnë akoma Lulin dhe këtë opozitë pulash të lagura që bëjnë sikur janë ujqër të tërbuar”, ka thënë Dako.

Sipas kryetarit të PD-së, kryebashkiaku i Durrësit është kapur jo vetëm nga shërbimet inteligjente, por edhe nga partnerët ndërkombëtarë. “Shërbimet inteligjente dhe ato partnere kanë kapur gafil Dakon, që u ka premtuar tendera kriminelëve me miliona euro për të blerë dhe vjedhur votën për Partinë Socialiste”, deklaroi ai. Basha thotë se kjo është edhe arsyeja e largimit të prokurorit që po hetonte çështjen, por edhe të vetë ish-kreut të SHISH, Visho Ajazi Likës.

“Këto prova janë nën hetim nga Prokuroria e Krimeve të Rënda. Këtë fakt e di Gjushi dhe mentori i tij, Edi Rama. Për këtë arsye ata ndërhynë për të larguar prokurorin që po hetonte këtë aferë kriminale. Kjo është një nga çështjet ku gjendet edhe arsyeja e dorëheqjes së papritur të shefit të inteligjencës shqiptare. Rama po përpiqet të shpëtojë Gjushin dhe gjushët e tjerë dhe përmes presionit kriminal ka larguar prokurorin Anton Martini, që po e hetonte çështjen”, u shpreh ai. Kryetari i PD-së i kërkoi Prokurorit të Përgjithshëm që të thotë para qytetarëve nëse lëvizja e Anton Martinit është bërë për këtë arsye apo jo. “T’u thotë qytetarëve nëse lëvizja e prokurorit Anton Martini është bërë nën presionin kriminal të Edi Ramës apo jo”, tha ai.