Declan Rice pritet i gatshëm për ndeshjen e Anglisë ndaj Ghanës pas shqetësimit me shpinë

Declan Rice u zëvendësua nga Morgan Rogers në minutën e 72-të gjatë ndeshjes hapëse të Anglisë kundër Kroacisë, pasi ndjeu dhimbje në pjesën e poshtme të shpinës. Mesfushori 27-vjeçar i Arsenalit ka pasur këtë shqetësim prej kohësh dhe skuadra pritet ta menaxhojë atë gjatë kampionatit.

Pas zëvendësimit u ngritën dyshime për gatishmërinë e tij, por pritet që problemi i shpinës të mos e pengojë përballjen me Ghanën në Boston të martën në orën 21:00, sipas bbc. Vendimi për ta larguar nga loja u mor për të mos rrezikuar gjendjen e tij fizike.

Trajneri Thomas Tuchel tha se kishte vënë re disa humbje të pazakonta të topit dhe sinjale diskomforti te Rice. Ai shtoi se, kur e pyeti, mesfushori tregoi menjëherë për dhimbje në pjesën e poshtme të shpinës dhe pjesën e sipërme të kofshës. “Nuk doja të rrezikoja; shpresoj që të mos jetë diçka më serioze”, tha Tuchel, duke theksuar se Rice e qetësoi në fund të ndeshjes.

Stafi mjekësor dhe trajnerët do ta monitorojnë situatën në ditët në vijim për ta menaxhuar më mirë problemin dhe për të siguruar pjesëmarrjen e tij në takimin e së martës; raporton bbc.