Dëmtim dhe lamtumirë për Salah, reagon Slot: Shpresojmë të kthehet deri në fund të sezonit

Fitorja e Liverpool kundër Crystal Palace la një shije të hidhur në “Anfield”. Në minutën e 59-të, Mohamed Salah u detyrua të largohej për shkak të një dëmtimi muskulor dhe u zëvendësua nga Frimpong.

Duke marrë parasysh si përfundimin e afërt të sezonit si dhe largimin e paralajmëruar tashmë të egjiptianit në fund të kampionatit, ndeshja e të shtunës mund të jetë paraqitja e tij e 440-të dhe e fundit për “reds”.

Trajneri Arne Slot komentoi për këtë çështje: “Nuk e dimë. Kjo është përgjigjja më e mirë që mund të jap sepse nëse them se mund të jetë një mundësi, atëherë të gjithë do të bazohen në fjalët e mia. Thjesht nuk e dimë”.

“Ajo që dimë është se sezoni përfundon pas katër javësh, kështu që nuk kanë mbetur shumë ndeshje. Do të duhet të presim dhe të shohim si është dëmtimi i tij dhe nëse është i aftë të luajë përsëri”, shtoi Slot.

“Ajo që di është se ai është kujdesur aq mirë për trupin e tij gjatë gjithë këtyre viteve sa do të ketë kohën minimale të nevojshme për t’u rikuperuar nga një dëmtim. Le të shpresojmë për më të mirën dhe që ai të jetë i disponueshëm për pjesën e fundit të sezonit“, deklaroi Slot.