Dështon në Kuvend votimi i parë për ndryshimet kushtetuese për provimin e integritetit të ministrave — 46 vota pro, nevojiteshin 54

Kuvendi i Malit të Zi nuk u shpreh sot për propozimin e Qeverisë për ndryshimin e Kushtetutës, i cili parashikon provimin e detyrueshëm paraprak të integritetit për mandatarin dhe kandidatët për anëtarë të Qeverisë, pasi nuk kishte deputetë të mjaftueshëm për të siguruar shumicën e kualifikuar dy-treçëshe të nevojshme për miratimin e ndryshimeve kushtetuese.

Për futjen e propozimit të Qeverisë në rendin e ditës së seancës votuan 46 deputetë, pa asnjë votë kundër dhe pa abstenime, ndërsa shumica dy-treçëshe përbëhet nga 54 deputetë. “Siç e shihni nga vetë votimi, nuk kemi shumicën dy-treçëshe, të nevojshme për ndryshimet e Kushtetutës, dhe duke qenë se kemi në njoftim bisedime shtesë mes përfaqësuesve të Qeverisë, shumicës parlamentare dhe opozitës, po jap pauzë dhe për vazhdimin do të njoftoheni”, tha kryetari i Kuvendit, Andrija Mandiq.

Komisioni Kushtetues dy ditë më parë i kishte propozuar Kuvendit të miratojë propozimin në fjalë, ndonëse shumica e anëtarëve të tij vlerësuan se disa dispozita të propozimit nuk ishin shpjeguar qartë.

Qeveria e kishte dorëzuar në Kuvend më 17 gusht propozimin për ndryshimin e nenit 103 të Kushtetutës së Malit të Zi, që rregullon zgjedhjen e Qeverisë. Sipas propozimit, presidenti i propozon mandatarin brenda 30 ditësh nga konstituimi i Kuvendit, pas provimit të integritetit të kandidatit në përputhje me ligjin; personi që nuk i plotëson kushtet e integritetit të përcaktuara me ligj nuk mund të propozohet për mandatar.

Gjithashtu parashikohet që mandatari e paraqet në Kuvend programin e tij dhe propozon përbërjen e Qeverisë, pas provimit të integritetit të kandidatëve për anëtarë të Qeverisë, në përputhje me ligjin, ndërsa për programin e mandatarit dhe propozimin për përbërjen e Qeverisë, Kuvendi vendos njëkohësisht.

Burimi: Vijesti