E bujshme! Rafael Leao pranë kalimit te Manchester United në këmbim të parave dhe Zirkzee

Rafael Leao i Milan është një nga emrat që Manchester United po shqyrton për pozicionin e krahut të majtë këtë verë. Lajmin e kanë konfirmuar sot mediat britanike, që thonë se “djajtë e kuq” kanë nisur edhe bisedimet e para me portugezin. Leao ka shënuar nëntë gola në Serie A dhe ka dhënë tre asiste këtë sezon me Milan.

Mediat shtojnë se ky transferim do të ishte shumë më i leverdisshëm financiarisht për United, që synojnë edhe Morgan Rodgers të Aston Villa. Portugezi ofron një alternativë shumë më të lirë, me Milan që kërkon rreth 45 milionë euro.

Kjo shumë është të paktën gjysma e asaj që do të kushtonte për të nënshkruar Rogers. Leao, 26 vjeç, ka ende edhe dy vjet të mbetura në kontratën e tij dhe aktualisht është aseti më fitimprurës i Milan, gjë që e bën shitjen e tij edhe më të mundshme.

Edhe “Gazzetta dello Sport” e konfirmon këtë lëvizje, duke shtuar se në këtë transferim mund të përfshihet edhe sulmuesi Joshua Zirkzee. Ai nuk është pjesë e planeve të United, ndërsa Milan synon ta sjellë në “San Siro” për të përforcuar sulmin.