Elefanti përplaset me makinën në Ugandë, tre të vdekur

Të paktën tre persona humbën jetën dhe katër të tjerë mbetën të plagosur pasi një automjet u përplas me një elefant në Parkun Kombëtar Murchison Falls në veriperëndim të Ugandës.

Sipas policisë, aksidenti ndodhi të dielën në mbrëmje, ndërsa automjeti po udhëtonte nga qyteti Arua drejt kryeqytetit Kampala. Në makinë ndodheshin shtatë zyrtarë të Autoritetit të të Ardhurave të Ugandës (URA).

Të plagosurit u transportuan fillimisht në një spital lokal dhe më pas në Kampala për trajtim të specializuar. Autoritetet nuk kanë dhënë detaje mbi gjendjen e elefantit pas përplasjes.

Autoriteti i Jetës së Egër të Ugandës u bëri thirrje drejtuesve të automjeteve të tregojnë kujdes gjatë kalimit në zonat e mbrojtura, duke theksuar se kafshët e egra kalojnë shpesh rrugët.

Aksidentet rrugore janë të zakonshme në Ugandë, ndërsa incidentet mes njerëzve dhe kafshëve të egra janë shtuar për shkak të zgjerimit të komuniteteve pranë habitateve të mbrojtura.