Erërat e forta shkaktojnë dëme në shumë vendbanime të Kosovës (Video)

Përkeqësimi i motit në 24 orët e fundit ka shkaktuar dëme të shumta materiale në pothuaj gjithë vendin, duke prekur sidomos rrjetet e energjisë elektrike.

Kështu, si pasojë e erës së fortë, godina ndihmëse e një servisi të makinave në fshatin Lebanë, gjashtë kilometra në veri të kryeqytetit, ka mbetur pa kulm. Pronari i këtij garazhi, Selatin Bllaca, i ka thënë KTV-së se përveç dëmeve materiale të pullazit, për fat të mirë, makinat e servisit të tij kanë shpëtuar pa asnjë dëmtim.

Pa pullaze kanë mbetur edhe disa godina në Mitrovicë, ku sipas Drejtorit të Drejtorisë për Mbrojtje dhe Shpëtim, Musa Dragaj, era e ka shkatërruar tërësisht kulmin e një ndërtese shumëkatëshe afër Xhamisë së haxhi Veselit.

Kështu, për më shumë se 18 orë nuk kanë pasur rrymë fshatrat Kqiq, Zasellë, Shupkofc, Vërrnica, Pirq e Shipol të Mitrovicës. Po ashtu, shiu dhe erërat kanë dëmtuar edhe disa stallë kafshësh, shtylla e trafo elektrike, duke lënë pa rrymë shumicën e fshatrave të Drenasit.

Shtyllat elektrike janë defunksionalizuar nga era edhe në disa fshatra të Fushë Kosovës dhe të Kastriotit.

“Dëmet më të mëdha janë shkaktuar në rajonin e Dukagjinit, në Pejë dhe në Gjakovë, po ashtu në Prishtinë dhe Mitrovicë”, ka thënë zëdhënësi i KEDS-it, Viktor Buzhala.

Ai ka theksuar se KEDS-i i ka mobilizuar të gjitha ekipet, që sa më shpejt ta sjellë në funksion furnizimin me energji në qytetet e prekura nga fatkeqësia natyrore