FOKUS – Çekia shemb kullat 355 metra të larta, simbol i transmetimeve radiofonike në Evropë

Dy kullat metalike, secila 355 metra e lartë, u shembën përmes shpërthimit të një pjese të kabllove mbajtëse.

Pamjet filmike treguan se të dyja strukturat u shembën brenda pak sekondash.

Për operacionin u përdorën rreth 4,5 kilogramë lëndë plasëse speciale.

Policia kishte evakuuar dhe siguruar zonën e kufizuar përpara shpërthimit, ndërsa data e saktë e shembjes nuk ishte bërë publike, për të shmangur grumbullimin e spektatorëve.

Transmetuesi, i vendosur rreth 30 kilometra në lindje të Pragës, ishte një pikë e rëndësishme e infrastrukturës radiofonike çeke.

Sinjali i tij, në frekuencën 639 kilohertz, dëgjohej edhe përtej kufijve të vendit, përfshirë në Gjermani.

Për të mbërritur në majën e kullave, teknikëve u duheshin rreth 45 minuta me ashensorin e shërbimit.

Dy kullat prej çeliku u përfunduan përkatësisht në vitet 1975 dhe 1976, në kohën kur vendi ishte pjesë e Çekosllovakisë.

Historia e transmetuesit në këtë zonë daton që nga vitet 1930.

Transmetimet me valë të mesme të radios publike çeke u ndërprenë në fund të vitit 2021 për arsye ekonomike.

Deri në fund të vitit 2025, programi “Country Radio” kishte vijuar të përdorte transmetuesin e Liblicës, por me fuqi të reduktuar ndjeshëm.

Planet për ruajtjen e kullave dështuan për shkak të kostove të larta të mirëmbajtjes dhe modernizimit, të vlerësuara në pak më pak se 7,0 milionë euro.

Mbështetësit e ruajtjes së tyre kërkonin që strukturat të shpalleshin monument historik, duke i konsideruar një shembull të veçantë të inxhinierisë.

Të tjerë argumentonin se transmetuesi duhej të mbahej funksional për raste emergjencash dhe fatkeqësish natyrore. /Ad.Ab./ a.jor.