FOKUS – Libani: Përparime në bisedimet për tërheqjen izraelite

BEJRUT/ROMË, 15 korrik /ATSH-DPA/ – Është shënuar përparim në bisedimet e ndërmjetësuara nga Shtetet e Bashkuara të Amerikës mes Izraelit dhe Libanit, të zhvilluara në Romë, bëjnë të ditur burime zyrtare libaneze.

Palët kanë rënë dakord të zhvillojnë një takim të ri ushtarak të premten, ku do të diskutohet krijimi i dy zonave pilot për një tërheqje të mundshme të forcave izraelite.

Sipas një burimi pranë presidencës libaneze, gjatë takimeve është vënë re një përmirësim i dukshëm i atmosferës dhe është rënë dakord për të identifikuar zonat ku Izraeli do të tërhiqet, ndërsa kontrolli do t’i kalojë ushtrisë libaneze.

Burimi theksoi se takimi i së premtes do të zhvillohet mes përfaqësuesve ushtarakë të Libanit, SHBA-së dhe Izraelit.

Gjatë takimit do të përcaktohen mandati dhe kuadri i zbatimit të operacionit në dy zonat e para pilot.

Nëse procesi rezulton i suksesshëm, modeli do të zgjerohet edhe në rajone të tjera.

Sipas zyrtarit libanez, dita e dytë e bisedimeve ishte më pozitive se e para.

Ai tha se fillimisht kishte pasur tensione, por më vonë atmosfera u përmirësua dhe u diskutua edhe krijimi i grupeve të përbashkëta të punës, megjithëse ende nuk janë caktuar përfaqësuesit.

Marrëveshja e fundit mes Izraelit dhe Libanit parashikon që tërheqja e trupave izraelite të testohet fillimisht në zona pilot.

Në këto zona, ushtria izraelite do t’ia dorëzojë kontrollin Ushtrisë Libaneze, pasi të konfirmohet se nuk ka më prani të Hezbollahut.

Zonat pilot që po shqyrtohen përfshijnë qytetet Zawtar al-Gharbiyah, Zawtar al-Sharqiyah, al-Ghandouriyah, Burj Qalawiyah, Sarifa dhe Frun në jug të Libanit.

Këto zona ndodhen në rajone që janë nën pushtim izraelit, nën zjarrin e ushtrisë izraelite ose pranë pozicioneve të saj ushtarake./ /Ad.Ab./ a.jor.