FOKUS – Përshkallëzohet lufta civile në Jemen

SANA, 3 shtator /ATSH-DPA/ – Luftimet janë intensifikuar sërish në Jemen, ku rebelët Houthi dhe forcat e qeverisë së njohur ndërkombëtarisht, janë përplasur në provincën Taiz.

Sipas burimeve ushtarake, rebelët Houthi kanë lëshuar më shumë se 12 raketa ndaj pozicioneve të forcave qeveritare përgjatë bregdetit të Detit të Kuq.

Raportohet gjithashtu për viktima mes ushtarëve të qeverisë.

Konflikti civil në Jemen vazhdon prej më shumë se një dekade mes rebelëve Houthi, të mbështetur nga Irani, dhe qeverisë së mbështetur nga Arabia Saudite.

Megjithëse që prej vitit 2022, ishte vendosur një armëpushim jozyrtar, luftimet janë përshkallëzuar sërish muajt e fundit.

Rebelët kanë kryer sulme edhe pranë ngushticës strategjike Bab el-Mandeb, një nga rrugët më të rëndësishme detare për tregtinë botërore, duke rritur shqetësimet për sigurinë e transportit ndërkombëtar.

Jemeni mbetet një nga vendet më të varfra në botë dhe lufta ka shkaktuar një krizë të rëndë humanitare.

Mbi 22 milionë nga rreth 35 milionë banorë varen nga ndihmat humanitare, ndërsa përpjekjet diplomatike për t’i dhënë fund konfliktit deri tani kanë dështuar. /