Forcat amerikane sulmojnë Iranin pas incidentit në Ngushticën e Hormuzit

Ushtria amerikane tha se kishte kryer sulme ndaj objektivave në Iran në përgjigje të një sulmi me dron ndaj një anijeje tregtare në Ngushticën e Hormuzit, për të cilin Uashingtoni fajësoi Teheranin.

Komanda Qendrore e SHBA-së (CENTCOM) tha se avionët goditën vendet iraniane të magazinimit të raketave dhe dronëve, si dhe instalimet bregdetare të radarëve, pasi Irani shënjestroi të enjten me një dron anijen mallrash me flamur të Singaporit ”M/V Ever Lovely”.

”Anija po lundronte përgjatë bregdetit të Omanit pasi doli nga Ngushtica e Hormuzit kur u godit”, sipas deklaratës.

CENTCOM e përshkroi sulmin si një “agresion të pajustifikuar” që shkeli marrëveshjen e armëpushimit midis Uashingtonit dhe Teheranit dhe minoi lirinë e lundrimit përmes njërit prej korridoreve më të rëndësishme tregtare në botë.

Media iraniane, përfshirë transmetuesin shtetëror IRIB dhe ”Press TV”, raportuan shpërthime pranë qytetit jugor të Sirikut në provincën Hormozgan, afër Ngushticës së Hormuzit.

Raportet nuk e specifikuan menjëherë shkakun.

Në përgjigje të sulmeve, Korpusi i Gardës Revolucionare Iraniane tha se marina e saj kishte sulmuar objektiva amerikane në rajon, raportuan agjencitë e lajmeve Tasnim dhe IRNA të Iranit.

Informacioni nuk mund të verifikohej në mënyrë të pavarur./