Gjirokastër, panairet e traditës bashkojnë Shqipërinë me Kosovën

Në Gjirokastër panairet e traditës të çelura përgjatë sezonit të verës promovojnë vlerat e artizanatit dhe zejeve si pika të forta për tërheqjen e turistëve. Tashmë suveniret e realizuara me mjeshtëri nga artizanët janë të preferuara për turistët ndërsa i marrin si kujtim nga vizita në qytetin e gurtë. Më domethënës bëhet organizimi i panaireve të tilla kur ata marrin përmasa mbarëkombëtare ndërsa pjesëmarrës janë mjeshtra të traditës popullore nga Kosova dhe trevat shqiptare.

“Vij nga Kosova, është hera e pestë që marr pjesë, punimet e mia janë çanta, punëdore, rruaza, aksesorë. Aktivitete të tilla janë shumë të mira për të na përkrahur ne artizanëve sepse ne kemi nevojë për mbështetje, ne jemi një shtet si Kosova, si Shqipëria, çdoherë që na bëhet ftesë ne asnjëherë nuk e refuzojmë”, thotë një artizane.

“Pjesë e këtyre aktiviteteve janë edhe artizanë nga treva të ndryshme nga Shqipëria dhe Kosova për të promovuar vlerat dhe trashëgiminë e punimeve të tyre të cilat janë artizanale dhe punime dore”, shprehet një tjetër.

Pjesëmarrësit i cilësojnë të domosdoshme aktivitete të tilla edhe për njohjen e traditave nga të rinjtë. Në Gjirokastër stina e verës po sjell një fluks të lartë turistësh duke rritur interesimin dhe kërkesat për punimet tradicionale. Përgjatë këtij viti qyteti i gurtë ka mirëpritur mbi 80 mijë vizitorë vendas dhe të huaj ndërsa sektori i turizmit është shndërruar në promotorin e ekonomisë lokale.