Gjirokastër, zjarret e qëllimshme gjatë verës problematikë për dëmet në pyje-kullota

Në Gjirokastër po regjistrohen rastet e para të zjarreve të verës në pyje dhe kullota. Vatrat e zjarreve kanë shkaktuar dëme kryesisht në sipërfaqet me bimësi ndërsa në disa raste po rrezikojnë rrethinat e fshatrave. Shërbimi Zjarrfikës ka kaluar në gjendje gatishmëria për të ndërhyrë në kohë dhe evituar dëmet e zjarreve gjatë stinës së nxehtë.

“Nga ana e Shërbimit Zjarrfikës Gjirokastër në të gjitha elementë kryesorë siç është stërvitja e vazhdueshme e efektivëve, logjistika edhe parandalimi janë marrë të gjitha masat, janë bërë të gjitha planet e punës, bashkëpunimet me të gjitha strukturat respektive me njësitë administrative dhe jemi në gatishmëri për të përballuar çdo zjarr dhe problematikë që do të na diktojë koha”, thotë Aurela Çani, përgjegjëse e Sektorit të Parandalimit , PMNZSH Gjirokastër.

Problematikë në këtë periudhë janë zjarrvëniet e qëllimshme, të cilat dëmtojnë sipërfaqet pyjore dhe vendosin në rrezik pasurinë materiale dhe jetën e banorëve. Përfaqësuesit e Shërbimit Zjarrfikës në Gjirokastër shprehen se personat që vendosin zjarre në pyje-kullota do të ndëshkohen nga organet ligjizbatuese.

“Nga statistikat dhe nga rastet në zjarret masive që kemi pasur në pyje-kullota kemi konstatuar shpeshherë që zjarret kanë qenë të qëllimshme, është bërë sensibilizimi tek pjesa e popullatës duke i informuar në vijimësi që nga ana e Shërbimit Zjarrfikës do të vijohet me masa administrative në të gjitha rastet, dhe nuk do të ngelemi vetëm tek masa administrative sepse zjarrvënia e qëllimshme është një vepër penale që shkakton dëme të mëdha”, shprehet ajo.

Përgjatë verës së vitit të kaluar zjarret në zonën e Gjirokastrës shkrumbuan rreth 3 mijë hektarë pyje-kullotë si dhe shkaktuan dëme të konsiderueshme për fermerët dhe blegtorët.