Gjirokastra, 21 vjet trashëgimi botërore e UNESCO-s

21 vjet më parë, Gjirokastra u bë pjesë e Listës së Trashëgimisë Botërore të UNESCO-s, duke u njohur botërisht si një nga qendrat më të veçanta historike dhe kulturore të Ballkanit.

Zëvendësministrja Albana Koçiu, në këtë përvjetor, e cilësoi “qytetin e gurtë” si një pasuri të përbashkët të njerëzimit dhe një krenari të jashtëzakonshme të Shqipërisë, e cila prej 21 vitesh po ia tregon vlerat e saj gjithë botës.

15 korriku i vitit 2005 erdhi pas një procesi të gjatë dokumentimi dhe vlerësimi, ku institucionet shqiptare, ekspertët e trashëgimisë dhe komuniteti lokal bashkëpunuan për të dëshmuar vlerat e jashtëzakonshme të qytetit.

Akademia e Shkencave theksoi në një reagim se, pranimi i Gjirokastrës në UNESCO u mbështet nga studimet e historianëve dhe arkitektëve, nga përkushtimi i Ministrisë së Kulturës dhe Institutit të Monumenteve të Kulturës, si dhe nga vetë banorët që kanë ruajtur me kujdes shtëpitë karakteristike me kulla, pazarin e vjetër, xhaminë e shekullit XVIII dhe kishat e periudhës osmane.

Kjo trashëgimi e gjallë, e pasqyruar në rrugicat e kalldrëmta dhe në citadelën e shekullit XIII, është një dëshmi e mënyrës së jetesës qytetare dhe e arkitekturës osmane të ruajtur në mënyrë të rrallë.

Gjirokastra nuk është vetëm një qytet-muze, por një simbol i identitetit kulturor shqiptar, një thesar që na lidh me historinë dhe që na vendos më fuqishëm në hartën kulturore të botës.